政壇：搞搞政：惡人挖官地剃政府眼眉

本來屬於「生態優先地區」嘅沙螺洞，近日有多項違規工程秘密進行，保育人士睇見就眼火爆。曾支持梁振英做特首。但講明自己唔係「梁粉」嘅天文台前台長「黑英」林超英，近日都對沙螺洞事件好有意見，佢覺得有人光天化日破壞政府官地，即係冇將政府放在眼內。

又難怪黑英咁勞氣嘅，話晒今次有人非法破壞天然斜坡，仲用推土機挖掘官地斜坡基座，當自己好似攞正牌咁。佢話咁做即係擺明剃政府眼眉，政府一定唔可以扮「睇唔到」，要求政府部門狠下決心整治呢啲目無法紀嘅惡人。好明顯佢係叫發展局局長「波波」陳茂波要做嘢啦！

黑英認為政府一旦向惡人示弱，只會令社會充滿更多矛盾，因為個個衰人都會化身成為惡人，專會向政府埋手攞着數。佢講得真係冇錯，香港嘅核心價值就係靠一班好人維持，好人要有好報，政府又點可以畀惡人得逞呢！波波收到未？