政壇：政商定格：姚祖輝選人大為青年發聲

港區全國人大換屆選舉提名期聽日結束，亦會喺兩個禮拜後進行投票。尋日喺馬場撞到曾任香港青年聯會主席嘅中華全國青年聯合會常委Andrew姚祖輝，佢話上禮拜五已報咗名參選，正努力拉票。

有傳言話身兼全國青聯副主席嘅考試及評核局主席阿Rock陳仲尼，或打退堂鼓唔參選人大，由Andrew頂上，因為佢哋都有青聯嘅背景。Andrew就話參選同阿Rock冇關，仲笑言自己已喺香港做咗多年青年工作，所以今次想將青年人嘅聲音帶入國家喎！

Andrew除做咗多年青年工作，八年前仲攞過青年工業家獎。佢喺哈佛商學研究院畢業，做萬順昌集團主席兼行政總裁時，萬順昌十年間由以香港為基地嘅鋼鐵貿易公司一躍成為以中國市場為主嘅工業鋼材服務供應商，所以佢對內地情況好熟悉。