政壇：搞搞政：英姐議辦禁過戶接班人
勞聯嘅立法會議員李鳳英退下火線，由勞聯主席「潘少」潘兆平接棒勞工界議席。議員任期喺月底完結，英姐話依家忙於清理喺立法會七樓嘅議員辦公室，原本諗住將辦公室所有嘢留喺原位「過戶」畀潘少，點知秘書處要佢搬走晒所有嘢先，等選舉後重新編排過啲辦公室。英姐好勞氣咁話，既然勞聯有人接班，而潘少又唔介意用番佢原本嘅辦公室，唔明點解要將啲嘢搬嚟搬去咁麻煩。
議會新丁潘少就用「戰戰兢兢」嚟形容即將「開學」嘅心情，又話有好多嘢需要英姐指點，佢仲講笑咁話，如果到時英姐去咗旅行，都唔知可以搵邊個求救。英姐就氣定神閒咁話，對潘少絕對有信心，又話新政府首份施政報告押後到明年一月發表，所以唔使咁快擔心住。英姐之所以向潘少大派定心丸，皆因佢計劃十月中去西藏旅行，遲啲仲想去埋台灣綠島睇風景添！
設計圖片及對白