政壇：阿王重返港島發迹地
喺工聯會大打「風車陣」下，成功喺立法會選舉贏多兩個地方直選議席，當中贏得最傳奇嘅相信係喺香港島搶灘成功嘅「阿王」王國興，但其實港島先係佢嘅發迹地。
阿王擔任東區區議員時，一直住喺北角和富中心，直到○六年擔任勞工界議員期間，佢就賣咗和富個單位，再買番隔籬另一幢半新嘅樓。○八年佢為工聯會開發新界「大西部」後，為咗方便出入服務新界西選民，佢就將北角個單位放租，喺屯門藍地買咗另一個物業自住，佢當時仲將蘇軾嘅詩句改成「日夜轉車三百趟，不如長做新西人」，以表開拓新西嘅決心。
今年再透過直選成功重返香港島，十足衣錦榮歸，難怪佢話當選後無論租又好、買又好，幾貴都要搬返港島住，佢仲話自己負擔得起，唔怕樓價高，但就講明會催逼政府穩定發展樓巿，唔好令大家咁重負擔咁話。
阿王話當選後無論租又好、買又好，幾貴都要搬返港島住。