SUN世代：鞋癡捐款內地助校建電腦室

於名牌鞋店工作的Michael，本身也是鞋癡一名，家中擁有二百多對鞋子。有別於其他鞋癡只收藏不穿，他每對鞋都會着。他說鞋子對他別具魔力︰「一買就會好開心。」原來他對鞋情有獨鍾，是與家族遺傳有關。與父母居於同一屋苑的Michael笑說：「我爸爸有幾十對鞋，媽媽就過百對，全屋最多都係鞋，所以我哋唔可以住同一個單位，唔係就得鞋海，無位放其他嘢。」

雖然物質生活豐盛，但Michael不忘幫助他人，六年前已助養山西兒童，今年更將年終獎金捐出來，資助內地三間學校興建電腦室：「用三千蚊買一件衫畀自己，送iPad畀朋友都會好開心，但好短暫。反而你起個電腦室畀小朋友，等佢哋可以上網接受更多外面資訊。佢哋嗰個笑容，你係唔會忘記。」Michael已計劃再資助其他學校，希望有更多小朋友受惠。