政壇：搞搞政：劉秀成「嗰一廁」跣唐唐

喺選舉期間，候選人做過嘅一切，無論大小都會被人翻舊帳。好似尋日電台搞嘅建築、測量及都市規劃界選舉論壇，競逐連任嘅劉秀成就被聽眾踢爆件陳年往事，話佢曾經試過掛住去廁所而唔記得投票，問佢如果再次當選，會點縮短如廁時間。劉秀成聽到後即刻打個突，話自己「唔記得」有件咁嘅事喎！

翻查資料後發現，呢位聽眾真係好記性，絕對唔係老作，原來五年前劉秀成真係憑住「嗰一廁」，改變咗議會歷史。話說○七年時任財爺嘅唐唐，發表嗰份預算案狂派糖，諗住以歷史高票通過之際，原本講明投贊成票嘅劉秀成因食錯嘢，趕住去廁所「辦大事」，最終就以一票之差誤唐唐大事，令呢份預算案唔能夠以歷史最高票通過。

咁大件事都唔記得，劉秀成記性好差喎。唔知另外兩位候選人謝偉銓同吳永輝會唔會喺之後嘅選舉論壇大打「廁所牌」呢？