政壇：政商定格：囝囝99日宴施榮忻High爆
剛卸任百仁基金主席嘅Jaime施榮忻早前喜獲麟兒Torres施湧濤，日前擺九十九日宴，取其長長久久嘅好意頭。Jaime大爆太太Jaymee起初懷孖胎，點知其中一個喺懷孕個多月不幸流產，好彩Torres生命力強，成功出世。兒子得來不易，一家人都分外感恩。
囝囝慶典，Jaime十足自己結婚咁開心，話晒係菁英會創會主席，城中富二代兄弟雲集，常務副主席梁宏正帶埋太太張曉君出席，廠商會展覽服務有限公司主席吳永嘉就有太太Esther相伴。幾杯落肚，Jaime心情High爆，呼籲賓客「咪早走」。佢致辭時又將囝囝的九十九日宴講成係九十九歲生日，兄弟都笑佢飲醉咗！而身為二佬嘅廠商會會長Irons施榮懷滿場飛敬酒，酒量深不見底。
施榮忻（右一）喜獲麟兒，同二女（右二）、大女（右三）及太太（左一）合組溫馨五人組。
廠商會副會長吳永嘉（右）瞓身搞工展會，太太好支持。