政壇：沈祖堯點醒頹廢大學生

最近中大校長沈祖堯喺學生報讀到一篇題為《我所知道的大學日記》，令佢忍唔住喺網誌度分享佢嘅感想。到底個學生有乜迷思搞到校長要「轉載」呢？

文章以日記形式，講述學生「初嚟埗到」，唔太適應校園生活。選科時組爸媽「通水」佢邊啲科目「易轆」，同高年級同學上課，又發現佢哋上堂釣魚，加上同房夜瞓，兼且取笑佢放學返去就溫書好「毒」好「宅」，令佢覺得很迷失，唔知應該跟大隊過「頹」生活，還是堅持自我做孤獨精好。筆鋒一轉，變成組爸媽嘅自我對話，講述自己要喺三年大學中好好享受生活，玩樂人生，燃燒青春。接住便是另一篇日記，作者快將畢業，愧疚沒有好好讀書，對唔住父母。

沈校長睇完感到惋惜，佢寫下網誌鼓勵新生在未來三四年嘅校園日子，尋找佢哋情之所鍾嘅人生目標，認真對待大學生活，並話大學教育唔係畀年輕人用嚟識派對朋友，亦唔係職業訓練，更唔係追尋舒適生活嘅機會。好明顯校長唔想學生咁頹廢，執筆點醒佢哋。