政壇：政商定格：鄧慶治囝囝再開拉麵店
佳能香港副總裁Mingo鄧慶治嘅囝囝鄧振豪喺短短兩年間，將「豚王」打造成人氣拉麵店，由一個麵檔擴充到依家兩間分店，背後獲得爸爸嘅默默支持。上周六佢哋嘅尖沙咀分店舉行VIP日，兩父子忙於招呼賓客，Mingo咁賣力，振豪亦好乖仔氹爸爸話：「我嘅咪即係佢嘅」，難怪Mingo都笑言想快啲退休享仔福囉。
米蘭站老闆姚君達帶埋太太同囝囝撐場，佢話近幾個月生意靜咗好多，但係舖租就一樣企硬，所以盤數要睇得好緊，但佢預料舖租會慢慢回落。至於喺中港兩地經營瑞士名錶生意嘅陳正欣就話內地店舖租金同營業額掛鈎，經營上有彈性，反而香港零售巿場就停滯不前，但對前景依然樂觀。
鄧慶治（左）樂於幫囝囝鄧振豪做義工，笑言等住享仔福。
陳正欣（左）帶埋太太（中）、囡囡去食麵，相當溫馨。