政壇：CY裝修禮賓府慳住使
特首CY梁振英早前話過會搬入禮賓府，據講近日禮賓府已搭晒棚架進行維修保養工程。其實回歸後每任特首無論係咪搬入去住，點都會修葺下。根據資料顯示，首任特首董建華淨係改裝個廚房就用咗一千萬元公帑，「貪曾」○五年搬入去就使咗一千四百五十萬元，至於CY今次就花費大約九百九十五萬元，可以話係歷來最慳家嘅特首。
我哋尋日見到禮賓府外圍搭晒棚架，特首辦話禮賓府屋頂嘅瓦片對上一次檢修已經係一九七九年嘅事，經年累月嘅損耗令瓦片出現破裂同嚴重漏水，所以係時候做保養維修咁話。工程展開無耐，預料年底就會竣工，費用會由建築署支付。
其實貪曾當年搬入禮賓府時，好大喜功花費近一千五百萬元公帑搞裝修，淨係興建專為佢享用嘅錦鯉魚池已使咗三十萬元公帑，貪曾真係視納稅人血汗錢如糞土。
