政壇：「國情同學會」熱唱慶周年

一班工商界專業人士因返北京修讀國家行政學院國情班而成立嘅同學會，話咁快又到咗一周年紀念。周年活動搞手之一嘅同學會副主席李細燕透露，已定咗下個月十三同十四號舉行慶祝儀式。點解慶祝要一連兩日？原來佢哋諗住衝出香港，將紀念活動移師深圳舉行，所以要「住一晚」喎！

成員都係好學人士，因此搞手特登安排咗內地一位著名嘅財經教授嚟到深圳向同學會成員講課，希望可以增進各人嘅金融知識，最重要仲可以藉此加深對內地金融方面嘅了解。

當然長途跋涉去到深圳，除咗聽書外，同學會一周年慶祝活動梗要有啲餘興節目輕鬆吓，最受大家歡迎嘅、又可以好多人一齊參與嘅，梗係搞卡拉OK比賽喇。