祖兒通宵寫親筆信談「情」

「龍兒戀」日前曝光，是非即滿天飛，女主角容祖兒疑因壓力大失眠，昨日終出關現身活動，只見她眼腫眼紅，原來她通宵撰寫親筆信自白，親證與劉浩龍初步發展中，與何韻詩則永遠是朋友。

全城熱話的「龍兒戀」，觸發何韻詩與十五年好友劉浩龍（師兄）反目，師兄升呢扮大牌等是非，對感情事低調的容祖兒，「夾在中間」實在吃不消，連續多日失眠的她，昨日現身電視城舉辦的《2012翡翠歌星紅白鬥》活動，吸引近百名傳媒採訪。

其實祖兒原定先到英皇學校交代「龍兒戀」，但最後選擇親自寫信交代，在全篇文字連標點剛好413字的親筆信中，她正式交代與師兄相戀：「和師兄的發展，仍然處於初步階段，他的誠意令我考慮給大家一個機會嘗試多走一步。」她直認這幾天非常無奈，因不想事件愈描愈黑，故寫信交代一切，免得太多的揣測令太多的人受到傷害，包括她自己。

祖兒自爆入行十三年來談的戀愛寥寥可數，自己非常重視每一段關係：「我都是認真義無反顧！」又暗示外界不要將師兄的事業與她比較，但言語間流露「未揀定」的心情：「希望對先生能盡快出現。」

講阿詩：永遠的朋友

至昨午二時半，身穿黃色大褸的祖兒略帶倦意及雙眼紅腫，活動期間面帶笑容顯專業精神。她在經理人陪同下受訪，聽到記者恭喜時，只幽默地說：「多謝！我就出唱片，你哋恭喜定我都啱喇！」當追問師兄曾否叫她向阿詩交代戀情，其助手即搶答叫記者睇信，祖兒則說：「希望大家多多體諒，多謝大家關心，連日嚟都好奔波喇！我屋企其實係睇到樓下啲車隊，佢哋都好慘！」

問到現時與阿詩是甚麼關係，祖兒說：「永遠都係朋友，友情不變！（公司畀壓力？）冇，我想講，我做咗咁多年，點會唔清楚同唔緊張自己公司呢？應該係話我好明白自己要做啲咩！（如果確認咗會認？）有好消息而且嗰個真係真命天子，結婚嗰日我一定請你哋飲，到時見！多謝！」

談師兄：用時間睇清楚

至於師兄被指扮巨星，祖兒力撐：「我諗呢方面唔能夠代佢回答，但我認識嘅佢從來唔係咁嘅人，不如畀多啲時間，用時間睇清楚每個人，包括我、包括佢！（佢同過阿詩求婚！）唔答喇！」祖兒逗留一小時後，乘七人車直駛灣仔英皇公司，截至晚上沒有再露面。

而戀愛中的祖兒，雖然戀情突然曝光感困擾，但昨日她返唱片公司接受網站訪問期間，與台灣天團五月天成員阿信分享心水歌時，表情多多，還讚日劇《悠長假期》是最浪漫的日劇。