政壇：蔡加讚搞龍舟賽闔家撐場

沙田城門河尋日舉行咗龍舟賽事賀端午，「玩具大王」蔡志明舉家現身，除咗蔡生蔡太之外，家姐蔡加敏與千金Chelsi、加怡及男友Jeremy都有到場。原來佢哋公司每年都派出「旭日龍舟隊」參賽，今年更由蔡加讚（Karson）擔任沙田龍舟委員會主席。

加讚擔大旗，點解唔見女友汪圓圓呢﹖對女友愛護有加嘅Karson解釋話，場地人多又熱，怕女友辛苦喎。講到扒龍舟，Karson話自己都好有興趣，但就未有時間學，考慮卸任主席之後，組番隊兵喎！蔡太年尾嫁女，會唔會催促Karson快啲成家立室？蔡太笑笑口話，自己好民主嘅，阿仔鍾意結咪結囉！佢又大讚汪圓圓心地好，最緊要個人純品喎，睇嚟呢杯新抱茶，唔使幾耐就有得飲喇。

同場仲有金至尊數碼行政總裁吳傑莊（Johnny），佢同沙田體育會主席李有全係老友，喺對方穿針引線下，做咗體育會名譽會長。Johnny笑稱，雖然自己唔係「沙田友」，但周末不時會入沙田做運動o架。