政壇：抽水插CY政棍其身不正

候任特首梁振英（CY）被揭發山頂豪宅有僭建後，即時有班牛鬼蛇神喺四方八面走出嚟，無論係泛民主派或建制派都撲出嚟說三道四，一時話CY「嚴重疏忽」，又話事件係「政治危機」，大肆抽水。不過，佢哋好似集體失憶咁，唔記得自己黨友都係醜聞之源。

各路牛鬼蛇神之中，最衰一定係食物及衞生局局長周一嶽，佢恃住冇得撈，大大聲話對CY僭建好失望，佢上個月先被本報獨家踢爆佢喺加列山道嘅住所僭建，成個露台都被玻璃嵌板圍封，其身不正都咁多聲氣，真係抽水抽到盡。

民建聯出名叫「僭建聯」，無論張學明、黃容根、陳鑑林，黨內唔少立法會議員屋企都有僭建，該黨成員兼立法會主席曾鈺成尋日出嚟批評CY屋企僭建係嚴重疏忽，點解佢又唔插班黨友無法無天呢？工聯會陳婉嫻亦企喺道德高地，猛批CY以無心之失作解釋實在講唔通喎，佢黨友「西鐵男」王國興早前都畀人踢爆屯門住所僭建玻璃露台，呢啲係咪「一時唔偷雞做保長」呢？

新民黨主席葉劉淑儀話公職人員最緊要有誠信，認為僭建二百呎同唐英年僭建二千呎都係咁衰喎，但佢好似忘記咗黨友史泰祖去年被踢爆上水別墅豪霸八千呎官地嘅事。

白鴿黨何俊仁同公文袋梁家傑都要求CY上任後即刻辭職，之但係白鴿黨黃成智同公文袋湯家驊都被揭有僭建喇，點解當時無人叫佢哋辭去議員職務呢？