政壇：張炳良賴教院個名累佢

新一屆政府七一上任，傳將掌管房屋事務嘅張炳良早前已嗱嗱聲辭去教院校長一職，留低唔少蘇州屎。佢尋日透過一封書信大講教院嘅角色，內容不離教院正名。做咗教院校長四年幾嘅張炳良深明師生嘅心結，佢話教院除咗名稱之外，其他一切同一間大學無異。佢任內幫唔到教院正名，臨走仲要得把口廢噏，當喺教院讀緊書嘅未來教師傻嘅咩﹖

死撐無分別

張炳良尋日出席一個電台節目，以書信形式大講教院嘅工作，由教院近年轉型講到開設碩士課程及頒授博士銜等，佢話，依家社會上有唔少人對教院嘅認知仲停留喺上世紀師範學院嘅年代，唔知道今時今日「（教院）已經同其他幾間由教資會資助的大學並無太大分別」。

佢強調，教院舊年申請香港研究資助局撥款項目嘅成功率喺八大中排第二，過去三年有成二千項研究成果……講咁多，無非係回應外界質疑佢未搞掂教院正名做大學嘅工作啫。張炳良呢個時候出絕招喇，佢話，歐美嘅頂尖或優秀學府，好似麻省理工都係以「學院」為名，但喺亞洲，「學院」就畀人「大專水平」嘅感覺。張炳良認為，就係呢種觀念，令社會大眾忽略教院已經脫胎換骨。

估唔到張校長臨走都嚟一招偷換概念，用大學同學院嘅名稱做文章。講嚟講去，只不過係話畀人聽，教院根本係一間大學，只係個名叫學院啫。如果真係咁，佢又使乜喺文尾話希望喺不久嘅將來出席正名慶祝會啊﹖自打嘴巴至此，張校長真係未做官，先示範官字兩個口。