政壇：湯顯明離任與港媒絕緣
政府換屆在即，冇得留低嘅官員近日紛紛開茶會作別，即將離任嘅廉政專員湯顯明（甜湯）據聞冇打算開茶會或記者會，淨係肯同內地傳媒做訪問，唔通佢驚被本港記者追問佢查貪曾查成點？
甜湯唔搞茶會，部門內嘅氣氛亦麻麻，據聞廉署班同事會喺嚟緊星期五下晝，喺廉署總部餐廳幫甜湯搞咗個Farewell Lunch，規模同以往離任嘅專員好唔同。
譬如之前黎年同黃鴻超離任，廉署手足開足六圍，今次甜湯離任，就只得首席調查主任以上人員出席，連埋其他部門，可能坐唔夠三圍，場面都算冷清。
有廉署職員話，可能甜湯唔想班下屬破費。但亦有廉署職員話，其實甜湯任內經常去內地、澳門等地開會，啱啱又去完北京，可能佢同內地官員熟啲啩！唔怪得淨係同內地傳媒做訪問啦！
