政壇：搞搞政：被寸冇實力陸宏廣挑機

立法會工程界議員何鍾泰已七十有三，喺該界別連任多屆，但至今仍未有意退落嚟。佢早排接受報章訪問時仲話界內「冇人夠實力接班」，呢句說話激起佢嘅老對手陸宏廣嘅怒氣，尋日即時走出嚟開記者會，講明極有可能第三度參選挑戰佢。

陸宏廣分別喺○○年同○四年兩度挑戰何鍾泰，但最終都鎩羽而歸。不過佢尋日就引述業界意見，指對方霸咗呢個位太耐，係時候換人做吓，又話政府近年推出嘅基建工程量唔平均，業界好多怨言，如果佢協調到業界其他人唔出戰，一對一佢贏面相當高喎。

有傳屢敗屢戰嘅陸宏廣冇喺○八年參選，係因為當年有泛民嘅黎廣德挑戰何鍾泰，阿爺擔心佢會分薄建制派嘅票源，令黎廣德漁人得利，因此將佢勸退。尋日被問及擔唔擔心又被勸退時，佢笑笑口話唔識答咁敏感嘅問題。