政壇：搞搞政：長毛若入獄無機掟煲呔曾

早前因衝擊替補機制論壇被判入獄兩個月嘅社民連立法會議員「長毛」梁國雄，之後佢向高等法院提出司法覆核，話有刑期在身唔可以參加立法會選舉嘅做法違反《基本法》。高院司法覆核結果會喺後日揭盅，適逢嗰日係煲呔曾任內最後一次出席立法會答問大會，如果長毛到時選擇即時入獄，佢可能會錯失最後一次掟煲呔曾嘅機會。

長毛平時會趁答問大會舉行期間大鬧同攞道具怒掟煲呔曾，搞到幾乎每次都會畀立法會主席趕出議事廳。佢試過喺今年三月向坐富商私人飛機外遊嘅貪曾掟吹氣飛機，舊年又向佢怒掟過糖同蕉形毛公仔，狠斥佢喺施政報告唔肯向市民派糖。佢尋日話如果到時法庭判佢敗訴，佢會要求即時入獄，以便趕得切出獄報名參加九月立法會選舉。雖然佢把口話唔擔心司法覆核結果，但就話希望到時有機會聽到煲呔曾嘅道歉騷喎！