山東貨皮薄水多日本種有糖心

【本報訊】內地富士蘋果主要產自山東、甘肅及陝西省，當中分銷香港的富士蘋果主要來自山東，據了解，由於山東蘋果「皮薄水多」，故十分適合香港人口味。

據本港生果店主表示，產自山東的富士蘋果「又平又正」，每年十至十一月是主要收成期，價錢會更平，約十元已有四個。至於來自新西蘭的富士蘋果亦屬於「新貴」，雖然價錢稍貴，但是入口「冇咁硬」，口感較好，約二十元三個。

最「矜貴」算是日本富士蘋果，果中有「糖心」，從果芯隱隱透出清新撲鼻的香味，令人一試難忘。雖然日本富士蘋果售價高達六十元兩個，但卻是送禮及過節的佳品。

「靚蘋果因為曬得太陽多，所以會紅啲甜啲。」位於九龍城的水果專門店老闆宋先生教路，揀蘋果首先要「墜手」，其次要像「彈西瓜」般用手指「彈一下」，如果聽到清脆的「嘭嘭聲」，即代表蘋果的水分充足「夠肉地」，屬於靚貨。