天文台前台長「黑英」林超英對保護環境嘅熱誠似乎連十號風球都吹唔走！香港地球之友尋日喺西九龍中心搞咗個節能活動，期間仲播咗段短片，由黑英喺成千呎嘅屋企示範點樣減低家用電器嘅用電量，而佢最精警嗰句就係「唔好畀啲電走入去電器就可以慳到電」。
黑英話佢老婆讀過中醫課程，知道成日吹冷氣會傷身，佢哋於是由去年開始只靠開窗嘅對流風，都可以瞓舒服覺。唔講唔知，原來黑英連沖涼都環保過人，只用清水沖身而唔落沐浴露，佢話身體自然分泌嘅油仲滋潤喎！
