政壇：郭台銘倡徵台版富人稅
台灣開徵《證券交易所得稅》嘅紛爭已擾攘三個月，連財長都落埋台，眼見各界嘈嚟嘈去，好似唔將班有錢人砌低就唔痛快咁，身為富人一分子嘅鴻海董事長郭台銘就幫政府度咗條橋，唔使再煩證所稅，索性徵收「富人版所得稅」。
郭台銘喺召開名為「早日結束無謂紛爭，全民一起拚經濟！」嘅記者會之前，講咗佢嘅新稅版本。佢話只需要針對全台灣前三百名有錢佬增加所得稅，咁樣政府每年就能夠增加一百八十億元新台幣嘅稅收。只要景氣好轉，政府可以停止徵收。
咦，咁似巴菲特喺美國提倡開徵有錢佬稅嘅？先兩日至有人感嘆要搵「台灣巴菲特」，郭台銘一聽即刻劃清界線，話台灣唔係冇巴菲特，台灣要嘅係企業家，對經濟發展同社會有貢獻嗰種，「巴菲特係個炒股票賺錢做慈善嘅名人，我哋冇辦法，亦唔願意，更加唔需要去學習」。
