政壇：齋噏政助有做嘢 譚志源拆爆彈

護短都要有技巧，一唔小心，好易捉蟲，政制及內地事務局局長譚志源（Raymond）尋日就喺立法會大會上做咗個真人示範。話說公文袋連續第兩個禮拜提出有關副局長同政治助理工作表現嘅質詢，上禮拜袋巾傑就問副局同政助出席活動嘅次數，當局仲提供埋有關數字。不過，尋日佢黨友問政助聯絡政黨嘅次數同相關詳情時，當局話冇相關數字喎，搞到嗰名黨友紮紮跳，話立法會畀錢政府請政助，但局方連咁簡單嘅答案都提供唔到，真係唔知好嬲定好笑。

Raymond回覆時話，政助同政黨及獨立議員每日都有「恒常嘅政治聯繫工作」，但呢啲政治工作好難逐一紀錄，所以當局提供唔到有關數字。佢講講吓又話，其實政治工作不在乎多少，有時見好多次議員，都未必能成功做到游說工作，加上政助不時要出席啲公開論壇加強同各界溝通，所以都唔係淨係同議員聯絡o架！佢仲拉埋一○年政助中期檢討出嚟講，話當時聘任委員會都認為各人嘅工作整體符合要求。連聘任委員會都要拉埋出嚟打底，真係唔該晒佢！

溝通工作難量化

講真，政助工作擺明係親疏有別，既然係咁見政黨，又點會白紙黑字留低真憑實據吖，加上有啲親疏有別太過抽象，的確好難量化，例如同議員打個眼色「溝通」應該要點寫吖？錯就錯在Raymond上禮拜列表出嚟，做乜要懶叻拋數字出嚟撐政助有工作表現呢？如果上禮拜佢冇懶叻，就唔使搞到尋日捉蟲，拆彈變爆炸啦！再講吖，政助嘅成績係點，市民、議員其實都心中有數，就好似白鴿黨鐵頭仁尋日咁講，政助係可有可無囉！