政壇：搞搞政：林公公唔撈貪曾隱形

外界好關注政務司司長「林公公」林瑞麟嘅去留問題，而佢尋日率先喺大氣電波宣布卸任後會去牛津讀神學，政界中人見「人肉錄音機」將會走人，都嚟講番兩句感受。

建制派議員好感性咁話，為頓失「敢言」嘅林公公感可惜之際，嗰頭泛民議員就好理性咁話，其實林公公硬銷都只因身在其位，歸根究柢，一切都係因為香港冇民主云云。再加上電視排山倒海嘅林公公金句重溫，唔知仲以為做緊「永遠懷念林公公」特輯添！

候任特首CY尋日都讚揚林公公貢獻良多，祝願佢生活愉快，身心安康。到特區政府新聞網尋日下晝發稿，報道林公公唔留任同候任特首回應，至發現眾多回應中，獨欠煲呔曾。