政壇：劉展灝細仔愛錶多過從政
尋日喺馬場見到工業總會副主席Stanley劉展灝，佢有份嘅兩隻團體馬「奪錶」同「無敵駿駒」同場出賽，大仔Gary燊濤夫婦同細仔Ronald燊霆都入場幫爹哋打氣。
Ronald之前喺英國修讀政治學，但佢話讀政治純粹為興趣，冇打算從政，依家專心幫爸爸打理錶行嘅生意。
佢自言好鍾意錶行份工，仲向記者展示手上自家代理嘅名錶，做埋生招牌添！現時仲係單身嘅佢，話唔擔心做盛男，皆因男士應該以事業為重喎！
Stanley就話自從成家立室後，見父母嘅時間相對少咗，入馬場變成家庭聚會嘅指定動作。但佢話今年六月開始要飛成都、北京同上海等地打理分店生意，尤其是成都係公司未來重點發展地，相信到時會更加忙喇。
