政壇：糖糖思歪重演選戰風雲
喺尋日舉行嘅立法會議員記者同樂日中，掀起全晚高潮嘅係幾位議員同記者合力上演最熱門嘅「揼手選舉論壇」。會計界議員陳茂波扮演「Dream Bear」（劉夢熊）維肖維妙，大家都爭相同佢合照，相反唐營核心嘅經濟動力林健鋒，雖然係扮「糖糖」，但就一啲都唔似特首選舉落選人唐唐，反而似前高官馬時亨多啲喎。
除咗陳茂波同林健鋒外，點少得鍾意扮嘢嘅陳淑莊，佢歪嘴扮葉劉淑儀主持論壇，而李華明就黐粒癦扮「鐵頭仁」（何俊仁），兩名記者就飾演「思歪」同「私生子」，再由台下記者同議員發問，好似糖糖嘅感情缺失，以至連「盛女」問題點解決都有人問，全場爆笑。
此外，議員同記者都有一齊玩遊戲，好似鬥快聽加工聲帶估議員發言嘅「猜程尋」、同埋「有口難言」同「收買佬」等，但全部都係記者隊大獲全勝。
