政壇：劉秀成寸爆敗家「曾總統」

油麻地戲院改建成為粵劇表演場地講咗四、五年，終於見到終點喇，預計今年七月就可以正式開張。立法會民政事務委員會主席同埋三名議員尋日親自到場驗貨。將來除咗戲班可以喺油麻地戲院表演外，非牟利團體使千五蚊就可以租場四個鐘，有份參觀嘅專業會議議員劉秀成一聽到呢個價錢即時大讚抵用，仲乘機寸番想扮「總統」嘅貪曾。

油麻地戲院超平租

改建之後嘅油麻地戲院有一個坐到大約三百人嘅演出場地，可以話係粵劇界嘅大喜訊，康文署署長馮程淑儀尋日就話，政府已經揀咗八和會館做場地夥伴，而非牟利團體亦可以租嚟用。

租四個鐘只係收千五蚊，劉秀成一聽到就忍唔住笑笑口話「曾特首一晚都……」，雖然佢冇講落去，但大家心知肚明，佢擺明係寸緊外訪期間住五萬四千蚊一晚總統套房、去惠州都要坐「空軍一號」旅遊巴士嘅煲呔曾，只係劉秀成厚道，冇將句說話講埋落去。

連串涉貪事件惹起公憤，有個別泛民主派嘅議員想追究貪曾，早前喺立法會提出不信任煲呔曾嘅動議，最終喺保皇黨護駕下敗北，依家亦準備彈劾佢，但相信都唔會成事，若果喺油麻地戲院上演公審貪曾，肯定可以響起頭炮，拍爛手掌呀！

講番轉頭，原來劉秀成喺呢十年來以播放三級片著名嘅油麻地戲院留低唔少腳毛，但佢去呢度係五十年代嘅事，佢話細個嗰時住喺油麻地，所以佢不時會去麥花臣踢波之餘，亦會去戲院睇表演，佢仲話好掛住當年嘅街邊小食添喎！

至於霍震霆就話，佢十年前已經開始幫手促成改建油麻地戲院，估唔到一搞就搞咗十年，諗落真係有啲唏噓。