政壇：證券會訪星取「苦水」經
六大證券會上個禮拜一連三天率團到新加坡交易所取經，今次其中一個「收穫」，係發現本地經紀同當地經紀感同身受，都活喺同一天空下！原來佢哋係講緊加時，事關當地經紀同佢哋一樣，因為午休時間而叫苦連天！
新加坡比香港更進取，午飯時間已取消，全日全天候買賣。今次有份去當地考察嘅證券學會會長李細燕就話，當地經紀同佢哋講，取消午休對成交根本冇幫助，當地經紀敢怒不敢言，更甚嘅係經紀行老闆話取消午休後變相拉長午飯時間，因要實施輪班制食飯，啲員工食飯時間由上午十一點至下午三點，每班一粒鐘，難怪老闆牙痛咁聲！
李細燕仲話同當地一啲初入行者傾過，佢哋原本諗住呢行時間好，彈性高，結果齊齊呻笨！
