政壇：搞搞政：梁美芬低買高賣三物業

立法會議員梁美芬素來鍾情中低價樓同黃金，相當之實際。回想當初，○八年佢進身立法會嘅時候，有成六個物業揸手，但四年後嘅今日，幾次入市、放售後得番三個，究竟佢係睇淡樓市抑或覺得揸現金穩陣啲呢？

梁美芬上任時，西半山有兩個單位、新界西又有兩個單位、九龍西都有兩個單位，但一○年樓市漸入佳境，佢就放咗手頭上兩個九西單位，再買入另一個九西單位，手頭上仍揸住五個單位。

到舊年年頭，樓市愈嚟愈火熱，佢先喺年頭買多個九西單位，然後由四月開始逐步放售，四月先賣出一個港島物業，九月再放一個新界西物業，跟住到今年一月中再賣多一個港島物業。

過去一年樓市由高位慢慢回落，佢就喺呢年內先後放出三個單位，低價買入、高價放出，睇嚟佢賺唔少喎！雖然同佢上任嗰時相比，依家手頭上得番三個物業，但佢揀得落手嘅樓，相信有番咁上下質素，就算唔賣住都可以出租畀人，財源一樣滾滾來。