政壇：吳文華那些年發歌星夢

一人有一個夢想，立法會秘書長Pauline吳文華都唔例外。佢尋日喺大氣電波分享人生點滴時，就自爆年少時鍾意唱歌夾band，參加過好多歌唱比賽，可惜未能突圍殺入樂壇，反而令佢入咗政壇做「大內總管」喎。

佢憶述父母思想好開通，冇逼佢讀書，令佢性格外向積極，讀書時做班長又做風紀隊長，仲主動幫窮學生補習同做義工。呢啲經歷令佢開始關心社會，於是畢業後第一份工就入咗房屋署，進一步了解廉租屋家庭嘅生活狀況同擔憂，對佢影響好深，希望將來為社會做啲事。

唔少人都讚佢做事臨危不亂，佢笑笑口話屋企有六兄弟姊妹，自己排第二，大家姐忙於拍拖，自己就擔起督促細佬妹做功課嘅責任，令佢明白同細佬妹相處，其實就同政府入面嘅人事管理一樣，都係要軟硬兼施，過程亦培養佢做人抵得諗，做得到嘅事會盡量做到最好。咁即今時今日做咗大內總管都係小時訓練有素嘞！