政壇：新立會垃圾分類搞破壞
環保嘅一大原則係循環再造，立法會搬入咗添馬艦新大樓後，樣樣一闊三大，新大樓內議員辦事處位處嘅各樓層，都設有茶水間畀議員或議員助理使用，茶水間內擺放咗三個垃圾桶，以回收廢紙、鋁罐及膠樽，不過有人同我哋話，清潔工人喺呢啲垃圾桶收垃圾時，都係撈番埋啲垃圾一齊攞去丟，令分類到最後都係嘥氣。
有議員助理爆料話，佢哋喺大樓內丟得最多嘅垃圾就係廢紙，鋁罐或膠樽唔係咁多，雖然佢哋跟足規矩、將垃圾分類處理，但清潔工人收垃圾時，卻將垃圾統一處理。立法會秘書處話，向工人了解過後發現，由於每日收到好少鋁罐同膠樽，所以工人用一個垃圾袋袋好晒所有垃圾，去到垃圾站再分類喎，佢哋亦承認呢個做法唔理想。