政壇：區選單張「全程」搞笑
區議會選舉下星期日殺到，選民收到嘅單張都愈嚟愈多，有啲宣傳單張真係搞笑兼睇到人擰頭。譬如係屯門市中心選區嘅候選人劉嘉麟，佢係上屆委任區議員嘅助理，今屆以獨立候選人身份參選，不過，佢嘅單張錯別字特別多，唔單止將「仁愛眼科中心」寫成「仨愛眼科中心」、又將「鑑於」寫成「監於」、「堂而皇之」寫成「堂而煌之」、「全情投入」寫成「全程投入」等等，真係服咗佢囉。
作為一個強調喺選區「工作多年」嘅議員助理，點解競選單張搞到咁粗疏、貽笑大方嘅？劉嘉麟回覆查詢時話，因為時間趕急，無時間校對清楚就要攞去印製，話要同選民鄭重道歉咁話，佢仲強調遲啲入屋嘅宣傳單張會校對多幾次，肯定無問題先會寄畀班選民喎。
屯門市中心其他三位候選人仲包括新民黨楊文達、民主黨陳家健及歐志遠。
