政壇：搞搞政：金刀梁失魂同安德尊改姓

香港大學校長徐立之決定明年唔續約，消息引嚟好多揣測，其中一項係香港大學校務委員會涉施壓，身兼該會主席嘅行政會議成員梁智鴻（金刀梁）過去兩日都不斷解畫，尋日出席一個長者學苑活動時，又有唔少傳媒等住審佢，唔知係咪壓力太大，金刀梁竟然頻頻犯錯，最搞笑係搞錯活動司儀、藝人安德尊個名為祈德尊。

見慣大場面嘅金刀梁尋日真係一反常態，一時錯叫社會福利署署長聶德權做局長，上台時仲連扣喺胸口嘅襟花都跌埋落地下，當佢以長者學苑發展基金委員會主席身份致辭時，竟然三番四次將安德尊個名讀成「祈德尊」，搞到安德尊都好無奈，惟有自嘲話自己叫「祈德尊」解窘。

金刀梁壓力難解嘅事件仲有一個解釋，即係金刀梁記錯人名，事關祈德尊真有其人，佢其實係前立法局同行政局非官守議員，而且仲曾經係企業家同軍人，作為老牌政壇人物，金刀梁可能真係熟知祈德尊多啲。