政情：最低工資禍港 肥仔張火滾

最低工資實施咗幾日，基層市民怕飯碗不保，中小企就怕做唔嚟，但勞工及福利局局長張建宗日前懶理民間疾苦，力排眾議死撐最低工資「生得逢時」。一開始已反對最低工資立法嘅富貴黨飲食界議員「肥仔張」張宇人尋日提起最低工資仍然相當激氣。

「問責制幾前己死」

張建宗日前話依家本港失業率低、經濟又好，相信最低工資出台後都唔會對本港嘅就業情況有乜大影響，但肥仔張似乎唔係咁睇嘞。佢話全世界有就最低工資立法嘅國家，其失業率都非常高，相信最低工資出台後，將來必定會推高本港嘅失業率。佢仲話張建宗講乜市民都唔使聽，因為將來一定會有統計數字畀大家睇清事實喎！佢仲話：「不過到時佢（張建宗）一定會有好多理由為自己解畫㗎喇，可以話係咁啱得咁蹺，一係就賴經濟唔好。」

肥仔張愈講愈火滾，將矛頭對準政府連珠炮發。佢話依家個社會咁多怨氣，煲呔曾同一眾問責官員絕對要負上最大責任，又狠批曾班子管治出問題，經常恃住有部分議員支持，做事急就章，往往政策未經深思熟慮就草率推出喎。

最低工資炮製出嚟嘅亂局都唔知點收科？咁喺肥仔張眼中，政府嘅主事官員張建宗又使唔使下台問責呢？一聽記者問呢條問題，肥仔張即時面色一沉，淡淡然咁講咗句：「我唔評論喇，問責制呢樣嘢幾年前喺我心目中已死，政府如今已經冇問責制呢回事。」

問責高官喺過去兩年不斷出事，遠嘅唔講，單係財爺鬍鬚曾發表廢柴預算案後，喺全城炮轟下竟然仍可安安穩穩過日辰，絲毫歉意都冇，問責精神形同虛設，肥仔張咁灰不無原因！