SUN世代：煙花王子綻放歡樂

每逢新春佳節及十．一，一簇簇璀璨絢麗的煙花都會在維港夜空綻放，與市民臉上的燦爛笑容互相輝映。在背後統籌精彩匯演的，是煙花專家毛偉誠（Wilson）。家族三代都從事煙火業的他，自幼便將煙花當玩具，十歲已明白放煙花的原理，長大後更創立自己的煙火製作王國。縱使起步時虧蝕多年，但他憑堅毅精神邁向成功，更屢奪國際大獎，為港爭光！

煙火一閃即逝，但Wilson二十多年來一直在煙花界發光發亮。爺爺從五十年代開始經營煙火貿易，Wilson幾歲起就以煙花炮仗做玩具，自小耳濡目染，對各類煙火非常熟悉。年僅十歲時，他已明瞭煙花燃放的原理：「嗰時我成個下晝坐喺廠度，將串炮仗拆開一粒粒，之後逐粒點着，用手指彈出去，不斷研究咩timing先可以令佢喺半空最頂點爆，背後嘅原理就係設計維港煙花嘅技術！」

中學畢業後，他遠赴美國名牌大學攻讀建築工程學，後來在當地迪士尼樂園擔任煙花燃放技師，累積了寶貴經驗，為日後煙花事業奠下穩固基礎：「迪士尼喺八十年代已經運用獨有嘅時間碼系統，預先調校好時間自動放煙花，好高科技！最重要係樂園日日都放煙花，訓練到我對每個程序都好熟練，一個月學到嘅已經等於其他人一年嘅經驗！」

Wilson於一九八九年回港，協助父親打理煙花出口貿易業務。五年後，香港開放舞台煙火市場，酷愛煙花藝術設計的他，毅然創立自己的煙火製作公司。可惜當時本地煙花市場太小，港人對煙火表演認識不深，公司成立初期年年虧本，但他沒有放棄，咬緊牙關捱下去。憑着對煙花表演的堅持，他最終獲得成功：「九七年回歸後，我哋負責青馬大橋開幕禮嘅煙花瀑布，之後仲贏得維港煙花嘅燃放機會！」

茉莉花喻戰勝沙士奪國際獎

Wilson除了包辦維港的煙花匯演外，更曾多次代表香港勇奪國際大獎，為港爭光！當中最令他感到難忘的，是○三年於有「煙花界奧斯卡」美譽的蒙特利國際煙花比賽中奪標：「當時正值沙士期間，我哋表演中有個漩渦形嘅茉莉花圖案煙花，但我present時將佢解釋為沙士病毒，同評判講煙花喺歷史中係打仗時用，有戰勝嘅意思，我嘅表演係寓意香港可以戰勝疫症，帶來希望同歡樂！評判覺得我表達到煙花嘅鼓舞作用，頒咗獎畀我哋！」

雖然在煙花事業取得成功，但Wilson並未停下腳步。他不斷絞盡腦汁，添加創新元素，例如於今年農曆新年的匯演中，就首創「小兔臉」，贏得市民歡心。雖然研發煙花過程繁複艱辛，但他深感值得，並綻出笑容說：「每次見到市民睇到好開心，知道自己做嘅嘢帶到歡樂畀好多人，真係好有滿足感！」