Sun角度：飲食業三招減省開支

通脹猛於虎，飲食業首當其衝，部分食肆為減輕加價壓力，設法減低成本，及以節省能源方式，對抗通脹。現代飲食管理專業協會會長胡珠列出三招對抗：第一是以較便宜的食材取代較貴的食材，如菜心貴時，就會改用白菜仔；牛肉貴時會轉用豬肉；東星斑貴會轉用老鼠斑。第二是菜式成本「拉上補下」，他說：「好似排骨炒河，因為排骨成本高，咪落少啲排骨，多啲河粉！不過基本分量都一樣係十六両一碟。」第三是節能，如在下午四時至五時客人量稀少時，關閉部分燈及冷氣。

韜韜停早市慳水電

此外，大榮華酒樓執行董事梁文韜坦言，為節省開支，部分分店會縮短營業時間：「好似灣仔分店唔做早巿，十一點先開門營業做茶巿，做最重點幾個小時，慳番啲水、電。」亦會由過往的向供應商取貨，改為直接到菜欄購買。但他無奈說：「依家乜都加，做生意真係好難，最低工資生效後，人工又加，好擔心屆時會有食肆捱唔住要執笠，推高失業率。」