政情：何世柱曲線保皇

由構思到立法用咗十幾年時間研究嘅法定最低工資，仲有唔夠一個禮拜就生效，雖然法例訂咗二十八蚊呢條底線，但好多行業嘅僱主、僱員到家吓都未傾掂數，幾日後，啲僱主分分鐘變咗違法者，身兼勞顧會資方代表嘅何世柱尋日就拉響警報，話有啲僱主喺法例生效初期可能會唔小心犯法，呼籲政府寬鬆執法。佢呢番話表面上係為僱主求情，受害者卻係打工仔，到最後都係為政府立法粗疏、執法艱難鋪定下台階啫！

何世柱尋日喺一個電台節目中話香港推行最低工資，尤其係條例實行初期，可以參考英國嘅做法，如發現僱主只係無心干犯最低工資條例、少計薪金時，但又願意盡快補回短付嘅金額，應該從寬處理，即係唔好即時控告佢哋，佢相信法例生效一段時間之後，所有矛盾可以化解。

唔告僱主:為政府鋪下台階

呢番話講得隱晦，一句講晒就係「僱主違法都唔好告住」。唔使問點解啦，因為大把僱主到家吓都未同員工傾掂飯鐘、假期錢等，幾日之後條例實行，員工嗰份糧分分鐘唔足二十八蚊一個鐘，照計僱主已經違法，但政府夠唔夠膽嚴厲執法呢？如果執法一日告一百幾十個僱主都似，但換來嘅可能係商界大反彈，炒魷、罷市乜都可能發生啫，所以何世柱輕輕拉警報，等社會人士有個心理準備，亦畀商界同政府都有個下台階。

最低工資幾經艱苦立咗法，但係法例缺乏細節，樣樣都要勞資自行協商，產生嘅問題已經令到人力市場好多糾紛，依家連執法都有問題，勞工及福利局局長張建宗嘅表現真係令人搖頭嘆息。