政情：搞搞政：謝曼怡接掌商務局

官場青黃不接，商務及經濟發展局局長Rita劉吳惠蘭喺上周突然因腸癌辭職後，究竟邊個會接呢個「三煞位」成為政商界焦點，人選滿天飛，當中包括該局兩名常秘黃灝玄同謝曼怡。正當大家估估吓之際，謝曼怡尋日忽然高調率領本港科研界訪京四日，推動雙方在創新科技領域上嘅合作，期間仲會同國家科學技術部會面添！莫非佢有機會跑出？

謝曼怡係煲呔曾愛將，○七年起由行政署調任特首辦常秘，三年後調任商務及經濟發展局就坐正D8（首長級第八級），升職速度快過搭直升機，加上有傳佢係下屆局長嘅大熱，所以要佢做Rita接任人並非冇可能。之不過，有政府中人認為，佢今年只有四十八歲，加上做咗常秘冇耐，資歷上似乎未到局長個位。咁即係話佢都係冷門啫！

其實，熟悉謝曼怡嘅人都知道，佢根本唔想咁快升職，皆因佢向來好尊重老公、現任發展局常秘周達明，唔想自己職位高過老公，所以就算被選中接替Rita，都未必肯應承喎！