政情：搞搞政：德成局長寸嘴唔認衰

早前都講過，因為財爺鬍鬚曾嗰份史上最廢嘅預算案，班立法會議員質詢預算案嘅問題爆晒燈，而喺幾千條問題中，雖不乏議員嘅玩嘢之作，但各局負責草擬答覆嘅官員都只會大耍官腔，尋日竟發現反常之作。

話說公文袋陳淑莊向民政事務局分別提出兩條問題，問局方會否考慮減工作表現不彰嘅局長曾德成、該局副局長同政治助理嘅人工。一如所料，回應副局政助薪酬問題時，局方繼續打官腔，但回應德成局長嗰條問題時，卻劈頭話：「對於特區政府施政，有各種善意批評，也有不合理的責難。」明眼人一睇，就知個回答充滿骨頭，擺明德成局長唔認衰，寸番陳淑莊。

雖然回覆上嘅署名係該局常秘楊立門，但由於公務員絕少主動撩交打，呢個咁具挑釁性嘅答案，好難唔令人覺得出自德成局長手筆。老實講，德成局長早前申亞一役，逆民意霸王硬上弓，最終喺財委會被扑低，醜態百出，呢啲都係佢自招，點到佢唔認衰！