政情：大新王祖興勤力又靚仔

喺財經界中，唔少都係子承父業，大新銀行集團主席王守業個囝囝Harold王祖興亦係其中一個。

尋日喺大新公布業績會上見到Harold，雖然佢○四年已加入大新做執行董事，但平時比較少見到佢，可能因為咁，大新銀行董事總經理黃漢興即刻交個咪畀佢，等後生仔表現吓，講吓公司未來嘅發展前景。唔知係咪由於佢負責金融業務嗰邊，所以發展大計都係集中呢個範圍，佢話今年要請差唔多二百個人壽保險經紀，又話要增加證券服務中心，由二十三間增至三十間，未來三年仲想將非利息收入增至百分之三十。攞咗咁多數據出嚟，睇嚟佢事前都做足準備工夫喎！

記者聽到身邊有啲行家讚Harold幾靚仔，佢仲鬼咁親切咁走埋啲行家度傾偈，話要第時多啲見面。其實，好少banker好似Harold咁nice，希望佢真係記得約見面啦，因為佢尋日話冇帶卡片，記者惟有等佢下次約見面時再攞過。