政情：李家祥為釣島拒遊日本
日本發生九級大地震後，滿目瘡痍，好多政商界人士都話暫時唔會去當地旅遊。尋日喺教育學院頒授冠名講座教授銜嘅典禮上見到身兼教院校董會司庫嘅李家祥，佢都話唔會去。
之不過，佢唔去嘅理由並唔係因為日本地震，而係因為早前發生嘅釣魚島風波，令佢好唔開心，所以冇打算去喎！但話口未完，佢就話若果下咗啖氣，話唔定都會去嘅。
雖則暫時唔去日本，但佢對日本菜絕唔抗拒，仲話馬會有兩間日本食肆，菜式同味道都唔錯，所以好多人去食，佢周不時都去嗰度醫肚添！
轉頭見到教院校董會主席彭耀佳，問起教院幾時可以正名做大學，佢話校方一切已經準備好，只差政府嘅決定啫！
