政情：泛民建制齊反加車稅
財政預算案建議汽車首次登記稅大幅增加一成五，政黨都唔多認同。立法會審議加稅嘅小組委員會今日開首次會議，選出主席，喺建制派人海戰術下，小組有成十五位議員咁多。據聞，反對加稅嘅白鴿黨甘乃威同對加稅有保留嘅建仔「象哥」黃定光會爭做主席。邊個做主席都好，政府呢次都有排煩！
政府話加稅係為咗紓緩交通擠塞，甘威對成效有幾多打咗個大問號，所以現階段傾向反對加稅；象哥亦話今次加稅同環保政策互相矛盾，例如政府為鼓勵搵食車轉用環保車而提供補貼，但私家車又冇，反過嚟仲被政府加稅，所以對加稅有保留。
喺十五名成員當中，泛民同建制派比例係六比九，雙方實力其實相當接近，加上成員之一嘅黃宜弘唔喺香港，泛民未必冇得爭。不過，兩邊嘅人都唔贊成加稅，政府可謂腹背受敵。
