政情：搞搞政：D姐寸嘴唔知金價升

呢排嘅問責高官認真寸嘴，繼保安局李少光同食物及衞生局局長周一嶽後，尋日又多個高官加入寸嘴行列。邊個？咪係公務員事務局局長Ｄ姐俞宗怡囉！

早前有立法會議員睇到預算案嘅相關回覆，話服務咗三十年嘅公僕可以攞到「紀念金針」，即係一個小小嘅金牌以示獎勵，而每個金牌由一千七百幾蚊漲價到二千幾蚊。

有議員尋日喺立法會特別財委會會議上追問金價升，政府有冇買定啲金做儲備呢？與會嘅Ｄ姐話政府冇買定啲金，仲話：「我冇水晶球，預測唔到啲金升得咁勁喎！」

老實講，政府使緊嘅係公帑，即係紀念金針都係嚟自納稅人啲錢，議員咁問只係想提醒政府應慳得慳，議員都冇水晶球㗎，只係睇個金市走勢啫，Ｄ姐使唔使擺出副乜都唔關佢事咁嘅款呀，咁仲反映佢喺象牙塔度做嘢囉！

仲有呀，公務員工會聯合會主席梁籌庭都攞過紀念金針，仲話個小金牌擺耐咗變色，懷疑係Ｋ金嚟。咁唔該Ｄ姐關注吓係咪買錯金嘞！