政情：周一嶽狂言醫生叫早唞

為咗令公立醫院內科醫生逃亡潮觸發嘅前線醫生怒火降溫，醫管局會喺下月中就最大爭議嘅醫生晉升制度同通宵當值津貼問題諮詢全體醫生，令兩大工會同意暫時按兵不動。但食物及衞生局局長周一嶽忽然喺上周六口出狂言，暗批啲醫生「斤斤計較」，講到醫生好似見錢開眼咁，言論再挑起一眾醫生怒火，火燒周一鑊。

班公立醫生呢兩日不斷喺社交網站Facebook嘅「關注內科醫生人手問題群組」留言，狂插周一鑊抹黑醫生。有人就上載多張「惡搞」周一鑊嘅海報，要求佢公開道歉，甚至叫佢早唞下台：「周局長，你累了，請你下台回家睡！」亦有人擺明車馬話要同周一鑊「斤斤計較」，因為大家不忍門診醫生只得三分鐘去睇有十三種長期疾病嘅病人，又或是醫生兩小時內要巡二十九個病人。

有人建議將海報張貼喺醫院，等市民知道醫生有幾苦，更有人話要喺報紙登廣告聲討醫管局同周一鑊。公共醫療醫生協會見群情洶湧，尋日發聲明籲同事冷靜，以免畀人指摘前線醫生破壞協議在先。