政情：棋哥寸CY民望未夠高
疑似特首候選人之一嘅全國政協常委兼行政會議召集人CY梁振英，尋日出席友好協進會舉辦嘅十二．五規劃研討會，喺答問環節期間，台下有位天津市政協提問，仲點名形容CY係「呼聲最高嘅未來特首候選人」，即時換嚟哄堂大笑，但在座嘅全國人大常委范徐麗泰似乎冇乜反應。
身為主持嘅另一全國政協常委陳永棋則即時搶白反駁，話：「好似係范太民望最高喎！」即時又換嚟另一陣笑聲，CY就木口木面，場面相當尷尬。
提問完畢後，棋哥再幽多一默話：「先由全國政協劉兆佳回應，然後至到兩位疑似特首候選人。」
棋哥早前話政務司司長唐唐係佢「心中（特首）大熱」，尋日又幫口澄清話范太民望最高，究竟邊個至係棋哥心目中嘅真命天子？
