政情：阿Paul白姐姐畀褫奪考起
話說立法會旅遊界議員謝偉俊（Paul）前日同白姐姐亮相電視節目，教人點樣分辨錯別字，期間主持人問「褫奪」係乜嘢意思？有兩個答案畀佢哋揀，一個係「奪去衣服」，另一個係「奪去姓氏」，點知佢兩個答後者，話古時畀人奪去姓氏係大懲罰喎，當然係錯啦！
佢兩個答錯題目唔在講，更加畀嘉賓、由藝人進修成為大律師嘅Money盧敏儀翻舊帳，Money笑住話：「我淨係知身為律師，改姓氏唔會畀人話，但除衫就唔多妥。」即時搞到阿Paul一臉尷尬，皆因佢老哥多年前曾經為一本周刊拍攝「半裸照」，聲稱「法律係與生俱來」，結果畀律師會警告，幾經上訴，最後被罰停牌一年至○九年三月。