政情：1823投訴凶鈴打爆施政混帳

近年嚟，煲呔曾政府倒行逆施，佢嘅「真兄弟」財爺鬍鬚曾早前發表史上最廢嘅預算案，激起民怨沖天，市民要上街宣洩怨氣，仲叫孖曾落台添！

立法會財務委員會下禮拜一起一連五日召開特別會議，討論各政策局同部門來年度嘅預算開支。行政署回覆財委會嘅書面質詢話，政府嘅1823綜合查詢同投訴電話服務，舊年未能達到八成來電可於十二秒內接聽嘅目標，原因係每個來電的平均處理時間由○九年嘅三百五十七秒，增至舊年嘅三百六十五秒，市民嘅電郵查詢同投訴數目，亦比前一年大增四成四，令現有人手難以應付。

行政署又話1823電話中心現有三百零七名全職員工同一百零一名兼職員工，日間繁忙時段約有二百二十人當值處理來電，夜間則約有十人，現計劃下年度再增聘約四十人以加強服務。

嗱！若果政府施政貼合民心，市民又點會有咁多投訴，狂打1823怒劈政府嘅不是吖！就連特首辦都有咁嘅趨勢，投訴多到收唔切，要搵專人代勞。

特首辦留用新媒體主任

針對有愈嚟愈多市民直接向特首同特首辦作出投訴，特首辦將喺下年度增設一名一級行政主任處理有關工作。若果政府做得好，又使乜嘥呢筆公帑，白白浪費納稅人嘅錢吖！

另外，特首辦又決定繼續聘用兩名項目主任，專責管理特首辦facebook同特首網誌等新媒體公眾溝通渠道，兩人現時月薪分別為二萬三千同二萬七千蚊。喺上年度重新招聘嘅特首辦特別助理職位，下年度亦會繼續聘用，以支援特首辦主任同各界溝通，該職位嘅年度預算開支為九十七萬元。