政情：方健僑橫濱遇震靠App脫險
無線科技商會會長阿Ken方健僑日前身在橫濱，經歷九級強烈地震，目睹鐵路站內嘅行人電梯猛烈搖晃，佢一度同其他同行團友失去聯絡，全靠iPhone手機內的「WhatsApp」程式，成功逃過一劫。經歷逃難十四個鐘，日前返港後仍猶有餘悸，行步路都覺得腳浮浮。
阿Ken早前參加貿發局協辦嘅交流團考察東京電訊業。考察完結後，佢同幾名團友由東京坐鐵路去橫濱玩。就喺抵達橫濱車站一刻遇上地震，佢匿埋月台一角避難，後來轉折入住避難中心，當晚氣溫低至二至三度，但只獲派發兩張紙皮禦寒，冷得佢騰騰震。
佢多番致電香港入境處求助，但不得要領，惟有不斷用「WhatsApp」向身在日本嘅朋友同貿發局人員發短訊求助，最後以車駁車方式，由橫濱返回東京下榻嘅酒店，仲成功搵番失去聯絡嘅團友。
