政情：搞搞政：打工仔假期兩制 卓永興精神分裂

立法會人力事務委員會會議尋日討論勞工假同公眾假期相差幾日嘅問題，呢樣嘢纏繞香港打工仔多年，難得政府有官員肯回應，班聲稱代表勞工界利益嘅議員又點會輕易放過勞工處處長卓永興吖。

工聯會葉偉明話，同樣係打工仔，有啲就可以放公眾假、有啲就只可以放勞工假，隨時搞到班打工仔精神分裂，仲指摘卓永興同班同僚即使只係去解釋同處理，都有機會搞到自己精神分裂喎！聽到咁講，卓永興即時煞有介事咁強調自己精神好健康喎！咁嘅回應真無聊，卓永興根本係扮無知啦！

街工梁耀忠接住發炮，話卓永興等高官身為公務員，個個禮拜都五天工作制，梗係唔知打工仔嘅苦況。卓永興避重就輕咁回應後，仲話佢同班同事為應付議員嗰百幾條涉及勞工處嘅預算案書面質詢，近排晚晚十點先收工喎。竟然仲呻辛苦，如果唔係佢同部門做得差、問題多，班議員又使乜入咁多條Ｑ質佢吖！