政情：唐唐CY鬥做邊緣人
疑似特首候選人政務司司長唐唐同行政會議召集人CY梁振英，尋日齊齊出席城市大學邵逸夫創意媒體中心命名儀式，兩人表現得好避忌，又企到離行離列，見到都戥佢哋尷尬。
CY係城大校董會主席，算係半個主人家，但佢上台之後即時閃埋一邊，點都唔肯企中間；另一邊唐唐又係咁，不斷嘗試將身邊嘅電視廣播有限公司副主席方逸華拉到中間位置，企圖拉遠自己同CY嘅距離，不過方逸華點都唔肯企中間，唐唐出動埋熊抱都拉唔郁佢。大家喺主禮台上擾攘咗一大輪，真係失禮人。
另外，城大校長郭位喺儀式後除多謝邵逸夫捐出一億元畀城大外，仲話覺得邵逸夫同方逸華兩公婆係「江山美人」，估都估唔到自己一把年紀仲可以見識方逸華嘅風采喎。咁識賣口乖，捐錢嘅人聽到都冧晒啦！
