政情：李少光諷市民貪錢無知 周一鑊亂噏添亂

日本九級大地震，福島爆發嘅核危機不斷升溫，本港更出現搶鹽潮同搶雞粉潮，可見港人已經去到唔理智嘅地步，但連日嚟班主事嘅高官竟然亂噏廿四，令人心亂上加亂。

國內早已宣布撤僑，惟特區政府仍歎慢板，至今仍未肯對全日本發出黑色外遊警示，畀外界鬧爆懶理港人死活。但保安局局長李少光前日竟喺立法會上冷嘲熱諷，話市民咁想政府發黑色警示，全因怕取消行程後航空公司唔肯賠錢，講到所有港人都係市儈之徒。火爆言論一出，隨即被外界狠轟佢推卸責任。睇到市民咁嘅反應，李少光至知道失言，尋日即刻為言論道歉補鑊。早知今日又何必當初呢！

齋噴口水同副手冇得比

經常失言嘅食物及衞生局局長周一鑊竟然冇吸取李少光嘅教訓，繼續亂噏。尋日本港出現掃鹽潮，周一鑊出嚟澄清本來係應做之事，但佢竟然回應話相信大部分港人，包括中、小學生有常識，都知食鹽無助對抗輻射，希望港人「要對常識認識多啲」；其後又話地球有四分三係海水，呼籲市民唔使擔心冇鹽食，擺明車馬寸爆搶鹽搶雞精嘅港人冇常識。

其實，市民最想知嘅，係政府確保有足夠嘅食糧供應，而唔係聽周一鑊用呢種鄙視式嘅訓話。相反，該局嘅副局長梁卓偉同日下晝召開記者會時，就清楚冷靜咁向市民解釋鹽嘅含碘量極低，食都冇用，同市民說之以理；而保安局副局長黎棟國亦講清楚畀市民聽日本嘅情況好嚴竣，呼籲在日港人搭飛機返港。

喺人心慌亂嘅時候，班主事官員就唔好再擺出一副高高在上嘅輕佻態度對待事件啦，仲要喺度狂噴口水，完全安定唔到民心，相比兩個下屬，李少光同周一鑊簡直相形見絀。